Madrid, 26 de maio de 2011. - A Casa de Galicia en Madrid acolleu hoxe a presentación da última novela do xornalista e escritor lucense Ramón Pernas, "Na luz inmóbil", editada por Algaida e gañadora do XI Premio Internacional de Novela "Emilio Alarcos Llorach". Na presentación interviñeron, ademais do propio autor, o delegado da Xunta de Galicia en Madrid, José Ramón Ónega, o director adxunto de ABC, Luis Ventoso, o director de ABC Cultural, Fernando Rodríguez Lafuente, e o editor, Miguel Matellanos. Fixérono ante máis dun centenar de persoas que acudiron ao acto, entre os que se encontraban os escritores José Manuel Otero Lastre, Milagros Frías e Juanjo Armas Marcelo, o xornalista Elías Rodríguez, o empresario Francisco Cal Pardo e o exministro de Cultura César Antonio Molina.

Ónega evocou a súa vinculación co mar de Viveiro, paisaxe común con Ramón Pernas e escenario da novela e valorou que Pernas "escribe que namora" e que o libro se inicia cunha frase que incita á lectura: "O mundo non está de acordo comigo cando reivindico a nostalxia".

Matellanes destacou que a novela recibiu o Premio Emilio Alarcos Llorach e a calidade do xurado que o outorgou nesta edición, no que se achaban dous académicos, e apreciou a idoneidade da Casa de Galicia en Madrid como lugar de presentación en tanto que os personaxes da novela se coñecen en Galicia pero reencóntranse en Madrid.

Para Rodríguez Lafuente esta obra de Pernas "é a novela dun apaixonada pola vida, pola Literatura e polo amor" e "a experiencia da vida trucada en experiencia literaria", unha novela que podería terse chamado "O verán en que lin a Cesare Pavere", porque a súa sombra e obra percorre todo o libro. Resaltou o paso do tempo como elemento de forte presenza na novela e a existencia nela dun lugar mítico, Vilaponte, que identificou con Viveiro, así como a construción dos personaxes e os moitos novelistas que se citan nela.

Ventoso resaltou que se trata dunha novela moi vivida e que a escribiu un home que viviu momentos irrepetibles como o tránsito da Galicia do panteismo, algo máxica e arraigada á terra, á actual -unha morriña que, dixo, describe de marabilla- e a transición política española "que o colle en primeira liña de obra, pelexando pola democracia,". Subliñou así mesmo o recoñecemento que o amor platónico ten na obra como feito certo.

Pola súa banda Pernas apreciou as distintas vivencias que se expresaron da lectura da novela e, neste sentido, manifestou que oíra falar dun libro que el non escribira e expresou a súa "gratitude inmensa porque o meu libro xa non me pertence, está nas lecturas dos meus amigos". Tamén afirmou que el non abdica nunca das terras de poñente, da galleguidad, e que é un home do seu tempo e ten "un enorme compromiso coa historia que está a vivir, por iso a novela pasa da melancolía á reivindicación".

Canto á xuventude e a amizade

"Na luz inmóbil" podería considerarse, segundo a editorial, como unha novela romántica, negra, de iniciación ou mesmo unha novela histórica, "pero sobre todo é un canto á xuventude e á amizade, a nostálxica recreación dun amor non correspondido coa que Ramón Pernas nos pasea pola historia máis recente de España,". Narra como durante o verán de 1967 unha parella de quinceañeros se namora nun pobo costeiro de Galicia: un amor de verán que derivará, co paso dos anos, "nunha paixón tan estéril como recorrente, mentres as súas vidas son sacudidas polos avatares do destino e os cambios políticos -non sempre pacíficos nin incruentos- convulsionan o país".

Ramón Pernas, natural de Viveiro, é licenciado en Ciencias da Información pola Universidade Complutense de Madrid, recoñecido xornalista que traballou para varios medios de comunicación entre eles Tiempo, Interviú e TVE, e novelista de longo recorrido, que foi galardoado, co Premio Ateneo de Sevilla e o Letras de Bretaña, entre outros, e finalista do Premio Nacional de Literatura. Foi director editorial de Espasa Calpe e actualmente dirixe o Ámbito Cultural de El Corte Inglés. Entre as súas novelas publicadas destacan "O pavillón azul", "Paso a dous", "Brumario" e "Libro das actas".